%
$154$ORDO CONFESSIONIS VIRORUM
Quantu tempu ha chi non ti hai confessatu?
Hai factu la penitencia?
Hai dictu tucti toi peccati a lu confessuri?
Haindi lassatu alcunu per virgongna?
Hai promisu a lu confessuri rendiri fama oi roba?
Hai odiu cum alcuna persuna?
Hai roba raputa?
Hai mugleri?
Si spusatu?
Si crisimatu?
Sai lu Credu?
Chi arti fai?
Hai qualchi scominica?
Hai alcuna garça?
Facti la cruchi e di: «Patri, mi confessu a Deu et a
la gloriosa Virgini Maria et a sanctu Micheli Arcangilu, a
sanctu Ioanni Babtista et Evangelista, a sanctu Petru, a
sanctu Paulu, a sanctu Andria, a sanctu Iacubu, a sancta Maria
Magdalena, a sancta Ursula cum tucta la sua sancta
compangnia, a ctucti li Sancti di Deu, et a vui, patri».
$155$PRIMUM PRECEPTUM
Hai amatu Deu supra onni cosa?
Hai adoratu lu suli, oi luna, oi stilli?
Hai qualchi libru di nigramansia oi di magaria?
Hai operatu tali cosi per via di altru, oi factu fari?
Hai datu fidi a sonni?
Hai datu fidi a donni di fora, oi a lupiminara, oi a canti
di auchelli, oi a planeti?
Hai datu fidi chui ad unu iornu, chi ad unu altru?
Hai portatu qualchi scrictura supra, per beni oi mali?
Hai portatu qualche cosa per fariti ad amari?
Haiti pentutu haviri factu beni?
SECUNDUM PRECEPTUM
Hai iuratu lu nomu di Deu invanu?
Hai iuratu per la Virgini Maria, oi per li Santi?
Hai iuratu per lu corpu oi sangu di Christu, oi Ostia santa?
Hai iuratu per l'alma di to patri, oi matri, oi altri morti?
Hai iuratu per lu iornu di Pasqua, oi Natali, oi Eclesia
santa?
Hai iuratu qualchi minsongna?
Hai iuratu di fari qualchi mali, oi di non fari beni?
Hai factu qualchi iuramentu, e poi non lu observasti?
Hai factu qualchi vutu?
Hailu complitu?
Hai factu vutu per mali?
Hai factu iurari ad altru?
TERCIUM PRECEPTUM
Hai factu servicciu la dominica e li festi comandati?
$156$Haindi factu fari ad altru?
Hai accactatu, oi vindutu, oi factu autri fachendi?
Hai lassatu la missa la festa per fari fachendi?
Hai factu fachendi in clesia?
Hai santificatu la festa e factu oracioni e laudatu Deu?
Hai statu cum devoccioni a la missa et a la predica?
Hai parlatu, risu, oi iucatu, oi festigiàtuti?
QUARTUM PRECEPTUM
Hai honoratu a to patri et a tua matri?
Hai pregatu Deu per ipsi?
Haichi statu obedienti?
Haili factu turbari?
Hannuti maledictu mai?
Haili subvenutu e visitatu?
Haichi maledictu l'alma?
Haindi dictu mali?
Hai honoratu li sacerdoti e religiusi?
Haindi dictu mali oi murmuratu?
Haili factu qualchi iniuria oi qualchi villania?
Hai honoratu toi parenti e persuni vechi et antichi?
Haili dilliiatu e datu pena?
Hai consiglatu ad alcunu chi chi faza mali?
DE GUBERNACCIONE FAMILIE
Hai figli?
Su crisimati?
Haili incingnatu lu Pater Nostru e l'Ave Maria e lu Credu?
Haili maledictu?
Haili factu confessari senpri?
Haili mandatu a la missa et a la predica?
Haili castiatu e bactutu?
$157$Haichi soportatu chi aianu iastimatu, oi santiatu, oi altra
ribaudaria?
Haichi sparangnatu colpi?
Haichi soportatu rapiri?
Hai scavi?
Haili stracciatu?
Haili iniuriatu «cani», e mandatu a la raia?
Haichi datu li loru bisongni?
Hai soportatu chi vayanu a rapiri?
Haili factu confessari?
Haili mandatu a la missa?
Hai tractatu beni la tua conpangna?
Haila stracciatu, oi bactutu?
Haila iniuriatu cum qualchi iniuria disonesta?
Haila lassatu inblanchictari?
Haila lassatu patricari cum perssuni tristi?
Haichi soportatu ornamenti contra lu statu so?
Haichi soportatu chi si aia culcatu cum lu picilillu allatu?
Hai tenutu li toi figli grandi culcati sparti?
Hai soportatu garzi a li toi figli in casa tua?
QUINTUM PRECEPTUM
Hai accadutu a qualchi homicidiu, oi datu consiglu, oi
aiutu, oi inprestatu armi?
Hai factu desertari qualchi donna?
Hai datu venenu ad alcunu?
Hai desideratu la morti di alcunu?
Haiti sacciatu di lu mali di altru, e dictu «gracia Deu!»,
«macari peyu!», «beni chi steti!»?
Hai statu malatu e non adimandatu la confessioni?
Haiti comunicatu senza contriccioni?
Haiti astinutu di lu matrimoniu per vintiquatru uri?
$158$Hai statu negligenti ad incingnari li cosi di la saluti di la
anima tua?
SEXTUM PRECEPTUM
Hai cascatu carnalimenti cum qualchi persuna?
Dimi la condiccioni.
Fu maritata?
Fu cactiva?
Fu virgini?
Fu tua figloza?
Fu tua cummari?
Fu tua parenti?
Fu monaca?
Fu sacrata?
Fu a locu sacru?
Fu di iornu di festa?
Fu di Quatragesima?
Fu infidili?
Fu contra natura?
Hailu factu cum garzuni?
Fu to parenti?
Fu clericu?
Fu to figlozu?
Havia ordini sacri?
Fu a locu sacru?
Fu di iornu di festa?
Fu di Quatragesima?
Hailu factu cum qualchi animali?
Haiti corruptu cum li manu?
Hai riquestu a qualchi persuna carnalimenti?
Hai iniuriatu ad alcuna fimina «bagaxa», oi garzuni
«karrusu scassatu», «poza dormiri cum mammata oi
cum soruta»?.
$159$Hai disfamatu ad alcuna persuna?
DE MATRIMONIO
Hai usatu lu matrimoniu cum tua mugleri iustamenti?
Haichi usatu contra natura?
Hai usatu comu li bestii per darreri?
Hai usatu quandu ipsa havi li raxuni?
Hai consumatu fora per non fari figli?
Hai usatu e pensatu supra altru?
Hai usatu per modu chi li toi figli lu aianu intisu?
Hai usatu per contrariu, standu ipsa supra?
Hai usatu per spassu, e non per crixiri e multiplicari?
Hai usatu forzandu la natura?
Hai consumatu matrimoniu sensa essiri spusatu?
SEPTIMUM PRECEPTUM
Hai raputu alcuna cosa?
Hai accatatu roba raputa?
Hai acatatu roba di scavi?
Hai trovatu alcuna cosa e non la rendisti?
Hai raputu fructi oi altri cosi di maniari?
Hai maniatu cosa raputa, esendu invitatu?
Hai vindutu alcuna cosa chui chi non vali?
Hai servutu toi patruni fidilimenti?
Haichi factu lu serviciu, tristu per dispectu?
Haichi factu dannu?
Hai inprestatu dinari ad usura?
Hai datu dinari inanti tempu, per haviri li cosi di mercatu?
Hai inchensi usurarii?
Hai conservatu roba raputa di altru?
Hai accactatu alcuna cosa e non la pagasti
$160$OCTAVUM PRECEPTUM
Hai factu qualchi iuramentu falsu?
Haindi factu fari ad altru?
Hai iuratu li cosi dubiusi, factuli certi?
Hai iuratu di oservari alcuna cosa e poi non la oservasti?
Hai iuratu fari qualchi mali?
Hai iuratu minsongni?
Hai iuratu non fari beni?
NONUM PRECEPTUM
Hai desideratu la mugleri di altru?
Hai desideratu toi parenti, oi commari, oi figlozi, oi
monachi sacrati, oi altri persuni?
DECIMUM PRECEPTUM
Hai desideratu la roba di altru?
Hai desideratu dignitati oi richizi di altru?
Hai desideratu trovari roba oi trovaturi?
Hai murmuratu contra lu imperaturi per li collecti, oi
contra lu Papa per li bulli, oi contra lu episcopu per
li decimi?
SUPERBIA, RADIX OMNIUM MALORUM
Hai rigraciatu Deu, to creaturi?
Haiti tenutu meglu di li altri?
Hai minisprezatu li altri?
Hai minisprezatu li gracii e beneficii chi Deu ti havi datu?
Hai factu qualchi peccatu per speransa di la misericordia
di Deu?
Hai desideratu richizi, oi dingnitati per superbia?
$161$Haiti misu a sapiri li secreti di altru?
Hai faguritu alcunu tristu?
Hai minisprezatu li comandamenti di Deu?
Hai minisprezatu li previti e li loru boni incignamenti?
Hai minisprezatu li poviri e dilliiatuli?
Hai negatu li toi parenti poviri?
Haiti misu in periculu per fari qualchi prova?
Haiti contristatu di lu honuri chi non ti è statu factu?
Haili volutu mali?
Haiti factu gabu di lu predicaturi oi confessuri?
Hai cantatu, oi iocatu, oi dansatu in clesia?
Hai biastimatu anni, misi, oi iorni?
VANAGLORIA
Haiti gloriatu haviri factu qualchi peccatu?
Haiti piglatu vanagloria quandu si laudatu?
Haiti laudatu ti stissu?
Hai factu oracioni oi elemosina, per essiri laudatu?
Haiti laudatu di lu beni chi hai factu?
Hai factu qualchi prova cum periculu, per vanagloria?
Hai geiunatu, oi factu altru beni, per vanagloria?
Hai andatu supra di ti, preganduti, per vanagloria?
Hai factu qualchi pocrisia?
Haiti gloriatu sapiri ben parlari oi negocciari?
IRA
Hai lassatu lu maniari oi lu biviri, per ira?
Hai lassatu la missa, oi predica, oi altru beni, per ira?
Haiti bactutu oi xipatu barba oi capilli, per ira?
Hai bactutu oi stracciatu mugleri, figli, scavi oi altri
persuni oi animali, per ira?
$162$DE BLASFEMIA
Hai iastimatu Deu oi Santi?
Hai factu santu lu diavulu?
Hai iastimatu lu iornu, lu annu, lu ventu, oi la choia?
Hai iastimatu la morti?
Hai iastimatu la ura e lu puntu chi naxisti?
Haiti iastimatu la ventura?
Hai dictu chi Deu non è iustu?
Hai dictu mai «o Deu, e chi ti fichi?»?
Hai dictu mai «chi non fussi natu!»?
INVIDIA
Hai havutu invidia di lu beni di altru?
Hai havutu invidia di la belliza, oi valentiza di altru?
Hai havutu invidia di la xorta, oi di la gracia di altru?
Hai volutu mali a nullu per invidia, oi factuli dannu?
Hai misu discordia infra amici e parenti?
AVARICCIA
Hai lassatu di fari elemosina per avariccia?
Hai lassatu patiri la ma famigla per avariccia?
Hai lassatu andari scausi oi nudi li toi figli oi scavi?
Hai factu qualchi figla monaca contra sua voluntati, per
avariccia?
Haiti lassatu patiri per avariccia?
Hai lassatu la missa oi predica per fari guadangnu?
Haiti inprestatu alcuna cosa e non l'ài rendutu?
Hai servatu roba raputa?
$163$ACCIDIA
Hai lassatu la missa oi la predica per langnusia?
Hai lassatu oracioni oi autru beni per langnusia?
Hai per langnusia non incingnatu, nè castigatu li toi figloli?
Haiti lassatu patiri cum la tua famigla, per langnusia?
GULA
Hai maniatu oi bivutu superchu?
Haiti camaratu la Quatragesima, oi altri iorni ordinati per
la Eclesia?
Hai geiunatu tali iorni?
Hai maniatu cosa raputa?
Hai maniatu inanti la missa?
Hai spisu superchu per la gula?
LUXURIA
Haiti toccatu li membri per fariti riscalfari?
Hai maniatu cosi calidi per acendiri la luxuria?
Hai factu inzinga, oi riquestu qualchi persuna?
Hai cantatu cansuni disonesti?
Hai parlatu palori disonesti?
Hai andatu a li nozi per vidiri li donni?
Haili desideratu?
Hai dansatu e strictu li manu a li donni?
Hai rampungnatu?
Hai amustratu li membri ad alcunu?
Hai toccatu oi basatu ad alcuna persuna a forza?
Haiti avantatu di lu mali?
OPERA MISERICORDIE SECUNDUM CORPUS
Hai visitatu li infirmi di lu spitali e confortatuli?
$164$Hai datu elemosina a poviri?
Hai visitatu li carzerati?
Hai albergatu li peregrini?
Hai acompagnatu li morti?
Hai vestitu li nudi?
Hai datu a maniari et a biviri a li afamati e bisungnusi?
OPERIBUS MISERICORDIE SECUNDUM ANIMAM
Hai datu bon consiglu a tucti?
Hai consolatu li adolorati?
Hai riprisu a cui fa mali?
Hai perdonatu l'inimichi?
Hai havutu paciencia in li infirmitati et adversitati?
Hai pregatu Deu per li amichi et inimichi e tucti li
defunti?
Ancora dicu «mia culpa» di tucti li peccati preteriti
presenti et asdimenticati, di lu iornu chi naxivu perfina a lu
presenti. Multu beni haviria potutu fari, chi non aiu factu,
e di multu mali mi haviria potutu guardari, chi non mi aiu
guardatu. Per quanti fiati e per quanti modi e maineri indi
aiu offisu Deu, indi sungnu dolenti e pentutu e dicundi
«mia culpa, mia maxima culpa». Pregu e chamu la
infinita misericordia di Deu chi mi perdungna, et a vui, patri, chi
mi dati la penitencia, e fachitimi la absoluccioni.
INCIPIT ORDO CONFESSIONIS AD MULIERES
Quantu tempu havi chi non ti hai confessatu?
Hai factu la penitencia?
Hai dictu tucti li pecati a lu confessuri?
Haindi lassatu alcunu per virgongna?
$165$Hai dictu: «si lu confessuri non mi adimanda di li
peccati, di non chi li diri»?
Hai promisu a lu confessuri rendiri fama oi roba?
Hai odiu cum alcunu?
Hai roba raputa di alcunu?
Hai qualchi scominica?
Si scketa oi maritata?
Si crisimata?
Si spusata?
Sai lu Credu, lu Pater Nostru, e la Ave Maria?
Facti la cruchi e di: «Patri, mi confessu a Deu et a la
Virgini Maria, a sancto Micheli Arcangilu, a sancto
Ioanni Bactista et evangelista, a sancto Petro, sancto Paulo,
sancto Andria, sancto Iacobo, sancta Maria Magdalena, sancta
Ursula cum tucta la sua sancta compangnia, et a tucti li
Sancti di Deu, et a vui, patri. Dicu «mia culpa», chi non su
vinuta in quista sancta confessioni cum quilla debita
preparacioni e contriccioni di li mei pecati, anci chui tostu chi
aiu vinuta per usansa, chi per devoccioni. Dicu «mia
culpa» di la confessioni passata per fina ora a lu presenti: non
mi aiu mendatu la vita mia, cussì comu diviria; senpri aiu
tornatu a li pecati e li difecti. Dicu «mia culpa» di li
dechi comandamenti di Deu, chi non li aiu observatu cussì
comu diviria: di amari Deu supra onni cosa; si eu lu amassi
e timissi, non lu offendiria in onni ura, comu lu offendu».
DECEM PRECEPTA
Ài adoratu ad unu sulu Deu?
Hai amatu Deu supra onni cosa?
Hai adoratu alcuna creatura?
Hai adoratu luna, oi suli, oi stilli, per magaria?
Hai facto alcuna magaria, oi factu fari ad altru?
$166$Hai charmatu ad alcunu?
Hai datu fidi a donni di fora?
Hai dato fidi a li strigi?
Hai dato fidi a lupiminari?
Hai datu fidi a sonni?
Hai yectatu li xorti?
Hai datu fidi a canti di auchelli, oi a gridi di gatti?
Hai datu fidi chui ad unu iornu chi ad unu altru?
Hai factu lu muzuni lu iornu di santu Ioanni?
Hai cotu erbi tali iornu?
Hai ascutatu lu fellu?
Hai gictatu lu rinali, oi factu lu crivu?
Hai factu gictari lu strullabiu?
Hai portatu scrituri di supra, oi altri cosi, per qualchi
fini mala, oi amuri?
SECUNDUM PRECEPTUM
Hai iuratu lu nomu di Deu invanu?
Hai iuratu per Deu oi per li Santi?
Hai iuratu per la Virgini Maria?
Hai iuratu per lu iornu di Pasqua, oi per lu iornu di ogi,
oi per li animi di li morti?
Hai iuratu per lu suli, oi per la luna, oi stilli?
Hai factu qualchi iuramentu falsu?
Haindi factu fari ad altro?
Hai dictu qualchi minsongna?
Haila confirmatu cum iuramentu?
Hai factu diri minsogni ad altru?
Hai factu iuramentu di fari qualchi mali?
Hai factu qualchi vutu?
Hai factu vutu per qualchi mala fini?
Hai factu vutu, congnoscendu to non lu potiri compliri?
$167$Hai alcuni fiati non dictu li peccati a lu confessuri per
virgogna, e poi ti hai comunicatu?
Hai datu oi promisu cum la fidi alcuna cosa, e poi non
l'a' observatu?
Hai statu reverenti, quandu si nomina lu nomu di Deu e
di la Virgini Maria?
TERCIUM PRECEPTUM
Hai factu servicciu la festa comandata?
Haindi factu fari ad altru?
Hai accatatu, oi vindutu, oi iucatu?
Hai auditu la missa?
Haichi statu cum devoccioni?
QUARTUM PRECEPTUM
Hai honoratu a to patri e tua matri?
Hai pregatu Deu per ipsi?
Haichi statu obedienti?
Haili factu adirari?
Hannuti maledictu?
Haili iniuriatu, oi bactutu?
Haindi dictu mali?
Haili dilliiatu?
Haili subvenutu?
Haili vituperatu et iastimatu?
Haichi maledictu l'alma?
Hai li sacerdoti e religiusi honoratuli?
Haindi dictu mali oi murmuratundi?
Haichi factu qualchi carcu oi iniuria?
Hai honoratu li maiuri di ti e toi parenti?
$168$MATER FAMILIE
Hai figloli?
Su crisimati?
Haiti incingnatu lu Pater Nostru e la Ave Maria e lu
Credu?
Haiti factu confessari?
Haili mandatu a la missa et a la predica?
Haili maledictu oi iastimatu?
Haili castigatu e bactutu?
Haichi soportatu chi aianu iastimatu oi santiatu?
Haili lassatu patricari cum persuni tristi?
Haili lassatu inblanchitari?
Haili lassatu ascutari lu fellu, oi vidirisi la ventura?
QUINTUM PRECEPTUM
Hai acadutu a qualchi homicidiu?
Haichi datu aiutu oi consiglu?
Hai factu desertari ad alcuna persuna?
Hai datu venenu ad alcuna persuna?
Hai piglatu oi datu alcuna medechina per non fari figli?
Hai factu desertari ad alcunu, donanduchi colpu?
Hai desideratu la morti ad alcuna persuna?
Haiti sacciatu di lu mali di altru, e diri «gracia Deu!»?
Hai volutu mali ad alcuna persuna, e si la havissi potutu
amazari, lu havirissi factu?
Haichi factu qualchi dannu?
Hailu disfamatu?
Haindi dictu mali?
Haiti adormixutu, allactandu la creatura?
Haiti culcatu la creatura allatu, inanti lu bactisimu?
$169$SEXTUM PRECEPTUM
Hai usatu carnalimenti cum qualchi persuna?
Fu cum clericu?
Fu previti?
Havia ordini sacri?
Fu to parenti?
Fu to cumpari?
Fu to figlozu?
Fu contra natura?
Fu cum donna?
Fu tua parenti?
Fu di iornu di festa?
Fu di Quadragesima?
Fu in locu sacru?
Haitilu factu cum li toi manu?
Hai desideratu ad alcuna persuna?
Fu to parenti?
Fu previti?
Hai donatu a maniari alcuna cosa a to maritu, per fariti
amari?
DE MATRIMONIO
Hai usatu lu matrimoniu cum to maritu iustamenti?
Haichi consentuto contra natura, oi per dareri?
Haichi consentuto quandu hai li raxuni?
Haichi negatu lu debitu per farili displachiri?
Haichi consentutu per dareri?
Hai usatu standu tu supra?
Hai usatu pensandu tu supra di altru?
Hai usatu e consumatu di fora, per non fari figli?
$170$Hai usatu sentendulu li toi figloli?
Haiti astinutu di lu matrimoniu inanti la comunioni?
SEPTIMUM PRECEPTUM
Hai raputu alcuna cosa?
Hai accactatu roba raputa, oi di scavi?
Hai trovatu alcuna cosa e piglatutila?
Hai vendutu alcuna cosa più chi non vali?
Hai piglatu a filari oi a tessiri? Hai raputu nenti?
Hai datu a tessiri, oi a filari, oi a lavurari? Haili pagatu
iustamenti?
Haichi tenutu la fatiga?
Hai factu lu servicciu di altru iustamenti?
Hai maniatu cosa raputa?
Hai murmuratu contra lu imperaturi per la cota, oi
contra lu Papa supra li bulli?
Hai statu a taliari zà et illà cum mala fantasia?
Haiti festigiatu, oi parlatu palori mali?
Hai andatu in clesia, per qualchi mala fini?
Hai cantatu et amintuatu Deu e li Sancti in li cansuni?
Hai lassatu la missa per langnusia, la festa?
Haila lassatu per andari a spassu, oi per maniari, oi
iucari, oi dormiri?
Hai laudatu Deu e factu oracioni la festa?
Haichi statu a perdiri lu tempu, murmurari, e diri
mali di quistu e di quillu?
OCTAVUM PRECEPTUM
Hai factu qualchi iuramentu falsu?
Haindi factu fari ad altru?
$171$Hai iuratu li cosi dubiusi, factuli certi?
Hai factu iuramentu, e poi ructulu?
Hai iuratu di fari qualchi mali?
Hai dictu qualchi minsongna cum iuramentu?
Havi inportatu dannu?
Hai iuratu di non fari qualchi beni?
Haiti pentutu mai di lu ben factu?
NONUM PRECEPTUM
Hai desideratu la mugleri e figloli di altru?
Hai desideratu parenti?
Hai desideratu religiusi?
Tali fantasii ànuti vinutu quandu si a la missa?
Haitidi delectatu?
DECIMUM PRECEPTUM
Hai desideratu la roba di altru?
Hai desideratu dingnitati e richizi, oi truvaturi?
Hai receptatu oi tenutu roba raputa?
SEPTEM PECCATIS MORTALIBUS
SUPERBIA
Hai congnussutu li beneficii chi Deu ti havi donatu?
Hailu rigraciatu e laudatu?
Haiti tenutu meglu di li altri?
Hai minisprezatu li altri?
Hai minisprezatu li gracii chi Deu ti havi datu?
Hai factu qualchi peccatu e dictu «Deu mi perdunirà»?
Haiti misu a sapiri li secreti di altru per diridi mali?
$172$Haiti contristatu quandu non ti è factu honuri?
Haili volutu mali?
Hai negatu li toi parenti, per ipsi essiri poviri?
Hai minisprezatu li poviri?
Hai minisprezatu li sacerdoti e li servi di Deu?
Hai disprezatu li loru boni amaistramenti?
Hai minisprezatu li comandamenti di Deu?
VANAGLORIA
Haiti consatu la fachi oi pilatu li gigli?
Haiti afachatu a la porta per essiri vista?
Hai andatu a la eclesia per essiri vista?
Haiti festigiatu cum nullu?
Haiti spannatu lu mantu per essiri vista?
Hai andatu a lu bisitu per vidiri repitari?
Haiti piglatu vanagloria chi sai lavurari di manu?
Hai andatu a li nozi e factuti gabu di altru?
Hai inblanchictatu oi pilatu, gloria ad altru?
Hai portatu alcuna cosa supra, per amuri?
Haiti piglatu vanagloria di tua roba, maritu, figli e scavi?
Hai portatu manigli, chirchelli, oi curduni di argentu,
per vanagloria?
Hai dansatu oi cantatu in clesiia?
Hai xutu a dansari?
Haiti pizicatu li manu?
Haiti piglatu vanagloria quandu si laudata?
Hai portatu muscu supra?
Hai caminatu cum qualchi mangna per vanagloria?
Hai portatu ornamenti contra la condiccioni tua?
Hai factu elemosina per essiri laudata?
Haiti factu gabu di altru?
Haiti lavatu la fachi cum aqua rosa?
$173$Haiti avantatu e dictu mali di altru?
Haiti misu, a lu consu, sublimatu, oi argentu vivu, oi
altri cosi?
Hai portatu scarpi pinti?
IRA
Hai dictu chi Deu non è iustu?
Hai lassatu lu maniari per ira?
Hai per ira lassatu la missa oi altru beni?
Hai per ira bactutu figli, oi scavi, oi qualchi animali?
Hai per ira bactututi lu pectu, oi xipatuti li capilli?
Hai per ira iniuriatu ad alcunu, dichenduli alcunu so
mancamentu?
Hai dictu mai: «O Deu, e chi ti fichi?»?
Hai mandatu a la raia, oi cum centu diavuli, a nullu?
Hai iniuriatu ad alcunu e dictuli «cani», oi «bagaxa»?
DE BLASFEMIA
Hai biastimatu Deu oi Santi?
Hai factu mai santu lu diavulu?
Hai iastimatu lu iornu?
Hai iastimatu mai la morti, e quandu chi virrà?
Hai iastimatu lu ventu?
Hai iastimatu lu iornu chi naxisti?
Haiti iastimatu la ventura?
Hai dictu mai «a la mala ura» et «a lu malu puntu»?
Hai iastimatu «quandu chi morrai?», oi iorni, oi anni?
Hai iastimatu ad alcunu «sii tu auchisu», oi «inpisu»,
oi «saictatu», oi «squartariatu»?
Hai iastimatu l'alma di li morti, patri oi matri e parenti?
$174$INVIDIA
Hai havutu invidia di lu beni di altru?
Haiti allegratu di lu mali di altru?
Hai havutu invidia di la belliza di altru?
Hai hautu invidia di la bona xorta di altru?
Haili desideratu mali per invidia?
Hai dictu mali di alcunu per invidia?
Hai havutu invidia di la gracia chi Deu duna ad altru?
AVARICCIA
Hai per avariccia non factu elemosina?
Hai lassata patiri la tua famigla per avariccia?
Hai lassatu andari scausi toi figli e scavi, per avariccia?
Haiti lassatu patiri per avariccia?
Hai factu qualchi figla monaca contra sua voluntati, per
avariccia?
Hai statu causa chi li toi figli oi scavi aianu raputu, per
tua avariccia?
Hai accactatu alcuna cosa e non l'a' pagatu?
Hai lassatu la missa, oi altru beni, per fari servizu oi
guadangnari?
ACCIDIA
Hai lassatu la missa oi predica per langnusia?
Hai lassatu di fari qualchi beni per lagnusia?
Hai lassatu yiri lordi e strazati a li toi figli, per langnusia?
Hai lassatu di fari serviczu per langnusia?
Hai per langnusia non castigatu e non incignatu toi figli?
GULA
Hai maniatu oi bivutu superchu?
$175$Haiti cammaratu Quatragesima, oi venniri, oi vigillii, oi
quatru tempora?
Hai geiunatu tali iorni?
Hai ructu lu geiunu?
Hai maniatu innanti la missa?
Hai lassatu la missa per maniari?
Hai spisu superchu per la gula?
LUXURIA
Hai usatu lu matrimoniu per dariti spassu, e non per
crixiri e multiplicari?
Haiti toccatu li secreti?
Hai parlatu palori disonesti?
Hai desideratu alcuna persuna?
Haiti festigiatu cu nullu?
Hai amusstratu li minni oi li secreti a nullu?
Hai cantatu cosi disonesti?
Hai ammintuatu Deu oi Sancti intra li cansuni?
Hai ascutatu favuli oi autri vacantii?
Hai datu a maniari a to maritu alcuna cosa, calida per
luxuriari?
OPERIBUS MISERICORDIE CORPORIS
Hai visitatu li infirmi?
Hai datu lemmosina a li poviri?
Hai visitatu li carzerati?
Hai abbergatu li peregrini?
Hai acompangnatu li defunti?
Hai vestitu li nudi?
Hai datu a maniari a li affamati et a biviri a li asitati?
$176$OPERIBUS MISERICORDIE SECUNDUM ANIMAM
Hai datu bonu consiglu a li ingnoranti?
Hai consolatu li aflicti e li adolorati?
Hai reprisu a cui fa mali?
Hai perdonatu li nimichi?
Hai portatu pacientimenti li infirmitati e li aversitati chi
Deu ti havi mandatu?
Hai pregatu per li amichi e li nimichi e li defunti?
Hai pregatu Deu per to patri e tua matri e per tutti
christiani?
QUINQUE SENSUS CORPORIS
Haiti delectatu vidiri vanitati?
Haiti dilectatu intendiri cosi vacanti e mali palori?
Hai gustatu, e non laudatu Deu chi l'à factu?
Hai adoratu qualchi oduri, e non laudatu Deu?
Hai toccatu li carni toi, oi qualchi bella cosa, e non
llaudasti lu so Creaturi?
Dicu «mia culpa» di tucti quisti peccati presenti,
confessi et asdimenticati, di lu iornu chi naxivu perfina ora a lu
presenti, di tucti quilli chi mi arecordu e di quilli chi non
mi arecordu e di quilli chi non mi sachu confessari. Per
quanti fiati, modi e maineri indi aiu ofisu Deu, indi sungnu
dulenti e pentutu, e dicundi «mia culpa, mia maxima
culpa». Pregu e chamu la infinita misericordia di Deu, chi mi
perdungna, e vui, patri, chi mi dati la penitencia.
CONFESSIO GENERALIS
Patri, mi confessu a Deu onnipotenti, meu altissimu
creaturi, et a la gloriosissima Virgini Maria, et a li cori di li
$177$Angeli et Arcangeli, Cherubin e Serafin, et a li sancti
Patriarchi e Profeti, e li sancti Apostoli et Evangelista, et a
tucti li sancti Martiri e Confessuri, et a li santi Virgini et a
tucta la curti celestiali, et a vui, patri. Eu miseru
peccaturi mi accusu haviri peccatu in diversi modi cum li chincu
sensi di lu corpu: primu di lu visu, chi multi volti mi aiu
dilectatu, consentutu et operatu multi mali; aiu
inmaginatu lu iornu di la festa; aiu parlatu, auditu, gustatu, toccatu
et adoratu. Per ingnorancia e per maliccia contra la divina
potencia aiu peccatu, non observandu soi comandamenti.
Aiulu ofisu in multi modi: ne li secti peccati mortali, per
mia superbia aiu minisprizatu li altri e desideratu honuri;
ancora ne li operi di la misericordia, non li aiu operatu;
virtuti theologi e di li virtuti cardinali, zoè fidi,
speransa ... prudencia e temperansa et iusticcia. Dicu «mia
culpa» di li secti duni di lu Spiritu Sanctu, e di li secti
peccati mortali, zoè superbia e vanagloria, ira, invidia, accidia,
avariccia, gula e luxuria, non solum contra Deu, ma contra
lu proximu e la anima mia. Di quilla ura chi naxivu per
fina a lu presenti, di tucti mei pecati mortali e veniali indi
dicu «mia culpa, mia maxima culpa». Pregu la divina
clemencia chi per li meriti di la sua santissima passioni e
li secti palori chi dissi, su lu lingnu di la sancta cruchi,
quandu pregau lu so celesti Patri per li soi crucifixuri, e per lu
doluri chi appi la gloriosa Virgini Maria, cussì hagi
misericordia di mi peccaturi, dunandumi spacciu di tucti
sacramenti e contriccioni ne la sancta fidi catolica, comu fidili
christianu. Per tantu, di onni pecatu chi aiu commisu et
operatu, confessi et asdimenticati, ofendendu lu meu
Creaturi, cum li ginochi in terra, bactendumi lu pectu,
amaramenti dicu «mia culpa». Prego lu onnipotenti Deu, comu
per misericordia ni liberau di li manu di lu dimoniu, e
comu perdonau a Maria Magdalena et a lu latruni in cruchi,
$178$cussì perduna a mi, miseru peccaturi; et a vui, patri, chi
mi donati la penitencia e fachitimi la absoluccioni di li mei
peccati.